【凱旋門大賽】「緣厚情摯」落實出戰 「勝局在望」或考慮熱身戰

Homan

11 July 2022 at 1:54:11 pm

日本一直希望可以贏得法國凱旋門大賽，隨著疫情緩和，預計今年會派出大軍出戰該項一級賽。

早前寶塚紀念賽冠軍「領銜」（Titleholder，タイトルホルダー）宣布會出戰凱旋門大賽，並預計用上橫山和生攻堅。如按早前計劃，佢現時正放草休息，稍後會到法國備戰，不作任何前哨戰。

而日本打吡冠軍「勝局在望」（Do Deuce，ドウデュース）就喺跑完打吡後決定遠征，並會繼續用上武豊出戰。早前馬主松島正昭與騎練商量後決定，唔會出戰任何熱身賽，直指凱旋門大賽。不過今日出席拍賣會嘅松島就話「勝局在望」有機會喺出戰凱旋門前有熱身賽，該熱身賽好大機會係尼爾錦標。睇下最後係咪成事喇，總之松島就話交曬比騎練決定喇！另外，松島仲話如果「勝局在望」表現好嘅話，有機會喺凱旋門大賽後，部署該駒出戰美國育馬者盃草地大賽，都係聽住先啦。

最後春季天皇賞亞軍「緣厚情摯」（Deep Bond，ディープボンド）亦落實出戰凱旋門大賽。上年先於福伊錦標贏馬，但於凱旋門大賽喺巴米高胯下得14名。今年幕後決定唔會喺凱旋門大賽前跑熱身賽，鞍上人暫時未決定，未知會搵歐洲騎師定日本本土騎師喇！

Source: 日刊スポーツ
Photo: 日本打吡截圖