【凡事走過必留痕跡】藤岡康太的最後禮物Justin Milano

由友道康夫訓練嘅Justin Milano（ジャスティンミラノ）於戶崎圭太胯下以紀錄時間贏出今屆三冠雄馬首關皐月賞。騎練於賽後異口同聲都多謝同一個人，無錯，佢就係上星期三離世嘅騎師藤岡康太。

Justin Milano服役以來三戰賽前都由藤岡康太主理晨操，今仗皐月賞前兩星期及一星期前嘅快跳都由藤岡康太主理。戶崎圭太賽後含淚表示相當感謝康太，認為賽前最後一星期嘅快跳造就今天這場既悲傷又高興嘅頭馬。佢話衝過終點腦海浮現出康太嘅笑容。佢覺得Justin Milano最終可以獲勝，係喺天國嘅康太從後推佢地一把，令佢地可以先過莫雷拉同Cosmo Kuranda（コスモキュランダ）率先觸線勝出。戶崎圭太相信康太見到呢場頭馬會感到開心。

賽後哭成淚人嘅仲有練馬師友道康夫。關西練馬師友道康夫已經搵藤岡康太為旗下賽駒操練多年，雖然兩年並未攜手勝出一級賽，但兩人合作相當愉快，佢亦都交唔少良駒比藤岡康太主理操練，包括「華格納」（Wagnerian，ワグネリアン）及「豐收節」（Makahiki，マカヒキ）。同樣地，Justin Milano由新馬戰以來，都一直由藤岡康太主理操練。

友道康夫於賽事最後階段大叫：

「康太！康太！」

是的，藤岡康太最終保祐這對騎練及人馬勝出這場一級賽。友道康夫同時亦回想起佢多次於訓練中心將馬匹及韁繩託付比康太快跳。終點後，友道康夫一路接受旁人嘅祝賀，亦與騎師戶崎圭太擁抱。之後佢再也忍不住哭起來。友道與康太兩人曾攜手憑「華格納」及「豐收節」勝出級際賽，友道康夫本想有朝一日兩人可以攜手勝出一級賽，可惜這一切都未能實現。

其父練馬師藤岡健一今日喺大殮儀式致辭，講述康太自小鍾意動物，小學五年級開始已經喺訓練中心嘅退役馬公園學騎馬。自其兄入讀騎師學樣後，康太就表示都要成為騎師。雖然曾經被勸說可以成為獸醫，不過成為騎師係康太嘅夢想。最後佢得到各方支援下成為騎師，過著幸福嘅生活。佢如果無成為騎師，相信唔會遇到其妻子。十個月前，康太與結婚四年嘅妻子誕下兒子，成為一位父親。雖然康太因故離世，藤岡家會致力保護並養育這位孩子。

多位騎師及當地賽馬業人士出席今日嘅大殮儀式，包括騎師會長武豊。武豊於致辭時表示康太人緣好好，不但深受年長騎師信賴，亦受後輩愛戴，不時會搵康太商量。喺武豊心中，康太係騎師協會不可或缺嘅存在。

藤岡康太肉體雖然止於4月10號，但大家都唔會忘記佢嘅精神及笑容。

願藤岡康太安息，一路好走！

Source: nikkansports

Photo: 賽事截圖

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1