【冠軍車手福永唔該你騎佢兩步啦】

Tony

26 April 2020 at 4:17:13 pm

​

今個星期賽事轉去東京同京都跑，連同福島一共有三場級際賽。普通賽事方面，星期六連環爆出冷門，單日出現5場過百倍頭馬，其中4場喺京都，另1場就喺東京發生。騎師方面除咗星期日京都嘅連環墮馬事件之外，有3個騎師喺今個星期到達生涯里程碑，而且都係喺福島發生。星期六有藤田菜七子贏出第100場中央頭馬，秋山真一郎到達1000場頭馬大關；星期日就到和田龍二贏出第1300場頭馬。

至於三場級際賽，先係星期六嘅福島牝馬錦標，呢場賽事出名年年都有不明物體入位，今年亦不例外。大熱「希冀」(Espoir)1檔起步就搶晒口仲要移出三疊望空都凶多吉少，結果三甲不入。反觀「波爾卡舞」(Fairy Polka)14檔起步就立心拉入內欄，再等到跟前嘅馬入彎移出去先拎個空位衝上嚟取勝，繼上個月中山牝馬錦標之後再贏三級賽，拎走維多利亞一哩賽優先出賽資格。「聖母珍露」(Liebfraumilch)就係入彎移咗出去果堆馬嚟，直路上追返唔少拎第2，跟前嘅「登山運動」(Randonnee)就影贏跑北海道細場特佳嘅「加勒比金」(Caribbean Gold)保住第3。呢組出嚟跑維多利亞一哩賽成功例子唔多，以「波爾卡舞」呢兩場表現預計都係爭位置居多。

星期日京都有讀賣一哩盃，「菲亞諾」閘前退出得返11隻馬跑。「冠軍車手」冇得嚟香港行紅隧唯有行高速公路囉，今次福永可以話係咁意推騎，一鞭唔使打，車都唔使塞，無驚無險又到終點，咁就袋走安田紀念優先出賽資格。以佢今日表現，如果佢嚟到香港跑，必定對「川河尊駒」同「美麗傳承」有更大威脅。隨住「杏目」改跑維多利亞一哩賽，「冠軍車手」可以話喺安田紀念擺下擂台陣，到時再同「頌讚火星」鬥過！Besten Dank向來跑京都表現特佳，年屆8歲面對強手仍然跑入一席第2算意外驚喜；反而「陳年美酒」今仗終於交出應有水準，可惜出閘慢咗，岩田望來選擇留到落包尾位置，入到直路一口氣狂追結果跑第3，嚟緊安田紀念可以留意。

同日東京嘅花仙錦標，岡田家族又下一城。大家睇下Win Marilyn，橫山武史雖然直路跌鞭，齋騎齋推都贏你外國騎師座騎，都可以話佢代表作啦。今年嘅橡樹大賽，如無意外都係岡田家族玩晒。Win系有一對馬，Normandy系有櫻花賞盟主Daring Tact，岡田繁幸自己都有隻Smile Kana在陣，實力隻隻超班。北方陣營有威脅嘅，可能就係Sanctuaire、Miyamazakura同「魔法城堡」，仲有前田家族嘅Ablaze。Ho O Peaceful左穿右插搵位之外，最終都力拒Juana來犯保住優先出賽資格。

Photo: Netkeiba

重溫：
https://www.youtube.com/watch?v=_ETDESur-zU
https://www.youtube.com/watch?v=0hnyvXsPenE
https://www.youtube.com/watch?v=e7-x0Gcv_Fc