【全面反底】岩田望來首奪重賞 小倉之鬼終結重賞大熱連敗

Tony

23 February 2022, 9:05:57 am

今個星期日本有4場重賞舉行,除咗二月錦標之外仲有三場三級賽。

星期六舉行兩場重賞,打頭陣嘅係京都牝馬錦標。日本網民成日都笑岩田望來騎咗97場重賞都未贏過,今次騎「樂桃源」(Lotus Land)又會點?排7檔出閘就推前守住第2位做啱第一步都知今場有機會贏,轉完彎入直路趕過埋放頭嘅Aster Ruby突圍,守佢後面嘅Sky Groove同Tantalus比佢走甩追足一條直路都追唔到,岩田望來出道4年第98次出戰重賞終於贏返一場。
https://www.youtube.com/watch?v=BNOQ8SCtzGE

另一場東京跑3400米嘅鑽石錦標,賽前都係話3隻4歲馬考牌之戰,特別係菊花賞第6名Veloce Oro同連贏3場條件賽嘅T O Royal。前面有隻Glengarry喺度段段12秒快放就睇邊個氣量好啲,似乎T O Royal更勝一籌,沿途守第4位唔怕你放,入到直路就踩油拋離對手,輕勝而回。T O Royal呢匹上年抽選跑唔到菊花賞嘅長途好手成功4連捷兼初勝重賞,春季天皇賞應為目標所在,但係威唔威脅到級數高佢好多嘅「緣厚情摯」(Deep Bond)就有待證明。「奔向紅玫」(Run for the Roses)力壓「東瀛敢拼」(Tosen Cambina)得第2略有驚喜;Veloce Oro都有第5,唔知下場會部署杜拜定係春季天皇賞?人氣馬「山茶花」(Melody Lane)尾二過終點,似乎唔識跑東京。
https://www.youtube.com/watch?v=bk8J4-UUnnU

星期日同場加映小倉大賞典,今年嘅重賞大熱門喺今場之前已經連輸19場,前一日T O Royal個個以為大熱開跑點知臨尾個大熱變咗「最優異」( L'Excellence)結果又冇影,今場大熱落喺小倉好手Arrivo度,抽中16檔都唔驚,沿途守住第10位,轉彎拉出去啤酒園追一段趕過對手,出道10戰5戰全部都係小倉取得頭馬,呢匹新一代小倉之鬼亦都終結重賞大熱門連輸嘅紀錄。唔夠獎金跑二月錦標嘅「掛鎖」(Cadenas)今場跑第3只輸比「花徑走走」(Rambling Alley)少少可以話寶刀未老,下次回師泥地又可以留意。
https://www.youtube.com/watch?v=n844cVmL824

知舍POG今個星期得一匹馬勝出,星期六東京1勝2000米小蒼蘭賞,Justin Sky沿途守住第2位走得好輕鬆,入直路見橫山武史推騎比足反應,最後300米趕過放頭嘅Ambition控制大局,後面Eikai McEnroe追極都埋唔身,咁就幫Roy執咗1030分,總成績暫時排第4。
https://www.youtube.com/watch?v=eoZQUlj4kwU