【做馬主未夠一年】藤田晉都贏重賞!

Tony

13 April 2022, 9:31:07 am

返嚟日本戰線,同大家睇完櫻花賞之後一齊返去睇兩場二級賽同一場表列賽。

星期六有兩場重賞,首先係二級賽阪神牝馬錦標,上年秋華賞冠軍「赤鳥之女」(Akatorino Musume)復出落筆打三更,入到亮相圈先話右後腳不良於行退出,得返11隻馬跑。良血馬「名將金歡」(Meisho Mimosa)上年轉播大阪盃賽日1200米賽事就見過,不過當時影都冇,事隔大半年到今年1月先喺小倉贏返場升班,今次初戰重賞就有驚喜,一路留喺內欄第6位左右,入直路鮫島克駿抄內欄衝上去好好反應,拍住隻Andvaranaut憑住個讓磅優勢過到頭,拎埋下個月維多利亞一哩賽優先出賽位。
https://www.youtube.com/watch?v=JnwCDhzUV5I

另一場中山嘅二級賽紐西蘭錦標,武豊賽前同李慕華幫賽馬娘賣廣告,跟住又幫CyberAgent老闆藤田晉名下嘅Jean Gros效力,起步夠快之後就放頭控足全場,橫山典弘騎上場贏三級賽新山紀念嘅Matenro Orion就留到第6位,轉彎飛出去大外檔爆一段埋Jean Gros身,兩大名將鬥足最後150米,不過Jean Gros仲有餘力步步壓住Matenro Orion贏埋,2隻馬連埋第3嘅Lubeck一齊拎走NHK一哩盃入場劵。藤田晉做馬主唔夠一年即贏重賞,嚟緊雅靈頓盃仲有1隻馬用武豊爭入場劵,睇吓到時可唔可以出夠兩隻。
https://www.youtube.com/watch?v=GrUACyxHYFA

星期日阪神除咗有櫻花賞之外亦有2000米表列賽勿忘草賞,川田將雅贏正本戲之前先贏一仗,Pearl Racing(卡塔爾陣營、「多利得」(Dunaden)綵衣)名下、中內田充正訓練嘅Art House,早段守喺第5位,入直路用返「唯獨愛你」贏馬一招兩隻馬中間穿上去,一出頭就彈甩兩馬位贏到收韁,計獎金已經入到橡樹出賽圈。
https://www.youtube.com/watch?v=coE8VhFeiqI