【今期係泥地嘅世界】

Tony

今個星期日本有兩場二級賽,當中有場係泥地仲要右轉,同場加映嚟緊轉播賽嘅出場馬。

日本呢幾個星期都係三料娛樂,星期六喺中山舉行嘅3歲1勝條件賽吳竹賞,Serein一路放頭,入到直路擺住正腳頂到完場,力拒對手來犯贏出。馬主前田家族野心夠大,賽後已經話會出戰下個月20號嘅阿聯酋橡樹大賽,會用武豊上陣,希望憑呢場成績出戰肯塔基橡樹大賽。

今日先上演東海錦標,「日輪之神」13檔起步放唔出守中間位仲要四疊入直路,隻馬真係唔識追架喎!結果開條上年10月同場同程公開賽太秦錦標翻版Q,上場大熱冇影嘅Air Almas拎到優先出賽權,Vengeance臨尾過咗「日輪之神」得亞軍。

至於美國賽馬會盃,嚟到賽期尾內檔場地爛到飛起,個個騎師下意識抄出外檔衝,結果直路走內檔一對包Q,今場復出嘅「防爆裝束」終點前岩岩好過咗「愚者眼界」,去晒外檔果啲個個爬返嚟,結果Last Draft先過「覓奇燕子」得季軍。「霜白絕塵」變咗早幾年嘅「湘南聲威」咁,入直路彎前收停咗。

重溫:
https://www.youtube.com/watch?v=4CngV0hjyqQ
https://www.youtube.com/watch?v=ZoEJn0MkGQ0
https://www.youtube.com/watch?v=XW05TxxnqyA