【五年過後】英國高等法院判鐵立基喺墮馬案勝訴

Homan

22 December 2021 at 8:59:13 am

早前提過嘅鐵立基（Freddy Tylicki）案（相關報導：https://bit.ly/3H5a5EI），英國高等法院法官於一連幾日聽取證會，並傳召多位人士作供，包騎師莫雅、郭善佳及高俊誠等。結果英國高等法院琴日宣判鐵立基勝訴。

事緣鐵立基於2016年10月31號喺金頓馬場策騎師時因墮馬意外而受傷，其傷勢嚴重，導致其下半身癱瘓。鐵立基認為墮馬起因為郭本誠（Graham Gibbons）策騎時有疏忽而導致，因而入稟控告對方尋求賠償。

由於當時英國馬會董事馬會認為事件純屬意外，並無人需要負上責任。喺一連數日嘅聽證會後，郭本誠一方指當時董事已有裁決指佢喺意外中沒有責任。不過法官聽取高俊誠及郭善佳嘅證供，甚至莫雅以專家證人嘅作供後，認為郭本誠喺意外發生前至少有四秒知道鐵立基並無空間推進，並且佢忽視當時喝止佢嘅鐵立基，導致意外發生。

雖然決定要喺電光石火間作出，但法官就話熟練嘅騎師有四秒去考慮已經相當足夠。法官續指，騎師唔單止要知前方發生嘅事，同時佢都需要了解其他同場馬匹嘅位置，包括座騎後方。因此，佢裁定郭本誠於五年前嘅意外有疏忽，需向鐵立基作出賠償。而金額暫時未定，仍要進一步裁決。

法官於判詞中表示當時董事未有推遲研訊，而係選擇即日完成感到相當驚訝。由於當時鐵立基因傷留醫而缺席，以致其證供未有被兼顧。英國賽馬會發聲明會詳細閱讀判詞後再作進一步回應。

而鐵立基就透過律師指希望今次可以為事件劃上句號，並繼續佢嘅生活。而希望藉此帶出雖然賽馬係一項危險運動，但不代表可以不顧對手安全而一直往前衝。

Source: Racing Post
Photo: Racing Post