【二刀流】2001年香港盃冠軍「愛麗數碼」離世 享年24歲

Homan

9 December 2021, 5:41:30 am

北海道十勝輕種馬農協種馬所公布,2001年香港盃冠軍「愛麗數碼」(Agnes Digital,アグネスデジタル)於放草中發生意外,最終被人道毀滅。

被日本傳媒譽為「二刀流」始祖嘅「愛麗數碼」出自Crafty Prospector,由美國入口到日本出賽。於1999年出道嘅「愛麗數碼」,出道之初專注泥地賽事,並於當時為日本二級賽嘅全日本3歲優駿(現稱全日本2歲優駿)贏馬。

轉歲後上半年曾於草地上陣,但未有頭馬進帳。踏入下半年先後於兩場泥地三級賽取得一冠一亞,之後轉戰草地一級賽一哩冠軍賽,結果於的場均胯下大後上奪冠,技驚四座。踏入2001年,佢於三場草地級際賽無功而回,並於下半年回師泥地賽,於日本電視盃及日本一級賽南部盃贏馬。同月月底出戰秋季天皇賞,正當大家以為呢匹得只係一匹泥地馬,於草地草只係偶一為之。結果再次展現強勁後勁,擊敗當年稍為滑落嘅「好歌劇」(T M Opera O,テイエムオペラオー),贏得秋季天皇賞,收獲第二座草地一級賽冠軍。

「愛麗數碼」對增程上哩半信心不大,且當時於9月起至10月底已連戰三場。因此幕後決定將目標瞄準香港國際賽期嘅香港盃。2001年日本代表攻下三項香港國際賽日嘅大賽,當中「愛麗數碼」就贏得香港盃。及後回國佢於泥地一級賽二月錦標再贏馬,令佢喺2001年10月至2002年2月四個月間合共贏左兩項草地一級賽及兩項泥地一級賽(當中南部盃為日本一級賽)。同年佢於杜拜世界盃及女皇盃上陣,結果於女皇盃被同樣係日本代表嘅「榮進寶蹄」(Eishin Preston,エイシンプレストン)擊敗,只得亞軍。由於連連征戰,「愛麗數碼」於香港回日後,就需要長時間休息。

休近一年後於泥地賽復出,結果無功而回。不過隔一個月後,佢於2003年安田紀念賽重返勝門,為佢帶黎第六個一級賽頭銜。及後表現滑落,並於同年退役轉任種馬。

雖然服役成績出眾,且場地性能廣泛,但配種成績不算太理想,於2007年有賽駒上陣起,截止現時為止,於日本只有8匹子嗣能取得級際賽頭馬。佢於2020年從種馬行列退落黎,並送到北海道十勝輕種馬農協種馬所頤養天年,並於琴日離世。

「愛麗數碼」嘅「二刀流」得來絕不簡單,尤其是近黎白毛馬Sodashi贏得草地一級賽後,於今個月初挑戰泥地一級賽冠軍盃失敗,更顯得「愛麗數碼」絕不簡單。

2001香港盃:https://www.youtube.com/watch?v=aaAr8v0ucZ8

Source:中日スポーツ
Photo: HKJC