【事隔兩年再做千王】All at Once換石川裕紀人照贏夏季短途錦標

星期日先由札幌上演1800米雌馬三級賽皇后錦標，4匹3歲馬過嚟對住年長馬揹51公斤起錶非常有利，論級數又以今年橡樹季軍Dura最高，早段留喺馬群入面，去到轉彎開始踩油上第4位，齋藤新等到入直路先郁手，最後100米先趕過「羅盤致勝」(Win Pyxis)，贏1個馬位。Dura今場贏完下場直出秋華賞，不過要反先Liberty Island難度幾高。

之後到新潟每年一度千王爭霸戰1000米三級賽夏季短途錦標，缺陣一年嘅All at Once復出本來用何澤堯助陣，結果佢前一日墮馬就換返前一年同場配搭石川裕紀人，排3檔一起步打斜cut入去外欄馬群後面，留到最後200米先郁手，一有空位就睇住「心盪漾」(Tokimeki)嚟食，繼前年之後再做千王。

跟住同大家睇2場年長馬跟進賽事，首先係星期六札幌3歲以上2勝2600米阿寒湖特別，每年要睇菊花賞潛在參賽馬呢場一定唔少得；今年就要留意Night in London，呢匹「大倫敦」(Greater London)子嗣喺POG時段只係贏一場2400米未勝利，之後喺6月再贏一場1勝2400米條件賽，上嚟呢組對手唔算強，早段留喺第9位，去到800米柱開始跟住對手上前，見和田龍二推到上頸咁款追到第4位，入到直路擺正堂軚睇住對手嚟食贏2個馬位，成功三連勝。賽後訪問大竹正博都話目標菊花賞，呢類夏季贏緊2勝條件份子再跑長啲分分鐘威脅到「鍵琴高奏」同「初日高升」，值得留意。

另一場星期日新潟3歲以上3勝1800米，Ramos繼「愛勁利」之後又有前POG參戰馬升上公開班，原定由何澤堯策騎Today is the Day換咗津村明秀上陣， 配搭弱咗唔少但係質素搭夠，排14檔起步早段就交出前速擺喺第2位，入到直路過咗短彎接合點先開始發力擺脫對手，最後100米過埋放頭嘅「立大名」(Ludovicus)奠定勝局。

知舍POG又有2匹馬交出勝仗，首先係星期六札幌頭場未勝利1800米，三級賽冠軍「仙女恩典」(Dea Regalo)首胎、Sunday會一口馬Regalo del Cielo上場東京初出起步慢咗一拍，之後跟住馬群，入直路開段全場最快末段收復唔少失地跑入季軍；今場轉戰札幌起步就唔算快，但交到前速拍住Blade Success一齊放頭，轉彎一踩油就控制大局，李慕華成條直路只係落咗一鞭隻馬自己加速彈甩馬群，未受考驗之下贏3個馬位，幫首映同JO賺550分；反而白毛馬Kalpa今場就一路走大圈，沿途跟住Regalo del Cielo跟足四段，入到直路人哋踩油自己跟唔住，結果只係過到Blade Success跑第4，賽後武豊話1800米對隻馬嚟講似乎太長，睇怕下場要縮程。

星期六另一場新潟新馬1600米，得6匹馬上陣，焦點落喺「野田赤蠍」全弟Danon Kilauea身上，今場出閘反應最快但川田將雅即刻扣住喺第3位，之後跟住Full Drive尾入直路，去到最後400米按韁未動都交出追勢，唔使推騎打鞭都贏到放頭嘅Land Max 1又3/4馬位，幫Pisa、JO、Alex、Edward及KC賺720分。隨住安田隆行下年退休，野田系都將呢類早熟短途馬交由中內田充正訓練，呢匹Danon Kilauea同「野田赤蠍」一樣咁快交到貨，年尾朝日盃有份跑都可以兼顧。

2歲組亦有一場跟進賽事，星期日新潟新馬1800米，上年就由3匹POG參戰馬包辦三重彩，除咗頭馬Danon Tornardo之外，2至5名都喺今年三冠戰線亮相；今年就可以留意絲綢會一口馬Cantiamo，初出用到川田將雅，出閘反應最快跟住同Sprinkle Salt一齊放頭，入到直路頭Sprinkle Salt已經散晒自己仲大把喺手，Mikki Stardom戶崎圭太按韁自動追上嚟仲一度出頭，不過最後300米兩隻馬單打獨鬥，川田左右兩邊開晒鞭再彈甩Mikki Stardom都係贏3/4個馬位，望埋時間1分46秒4，亦破2歲新潟同程紀錄。

至於知舍POG總成績，7月比賽結束之後仍然係南總領先，RedBluE同Hawaii分列二三位。

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1