【主帥威力】蘇銘倫將策「大利威」攻凱旋門大賽

Homan

23 September 2021 at 1:10:31 pm

法國凱旋門大賽將於下月初上演，阿加汗賽駒「大利威」（Tarnawa）於愛爾蘭冠軍錦標屈居亞軍，仍然決定進軍凱旋門大賽。

「大利威」上年於紅寶錦標及歌劇錦標贏馬，兩仗皆由蘇銘倫執韁。原本出戰育馬者盃草地大賽都由蘇銘倫操刀，惜當時蘇銘倫染疫而臨時改由簡國能執韁。而簡國能亦不負所托夥拍「大利威」贏得該項美國一級賽。及後回到愛爾蘭兩仗，都由簡國能執韁。上仗「大利威」縮程400米，敗於「金教堂」（St Mark’s Basilica）亦無辦法。賽後阿加汗決定部署呢匹雌馬攻凱旋門大賽，用回主帥亦屬合理舉動。

蘇銘倫為阿加汗效力多年，兩次凱旋門大賽都係策騎阿加汗賽駒贏得。佢地分別係2003「帶來吉利」（Dalakhani）及2008年「實夠威」（Zarkava）。究竟蘇銘倫能否憑「大利威」一搔十三年之癢呢？現時海外莊家較為看好呢匹雌馬贏出凱旋門大賽，開出3.75倍（11/4）嘅大熱倍率。


Source: At the Races
Photo: Scott Serio