Homan

3 March 2023 at 2:41:01 pm

騎師周俊樂於2月22號策騎「綫路光明」嘅方式受小組質疑，今日押後研訊。小組考慮各樣證供後，認為周俊樂並無違反第99(2) 條，因此沒有被罰停賽。

競賽小組於賽後質疑周俊樂於賽事早段及直路上「綫路光明」嘅騎法，並指控周俊樂違反第99(2) 條，即所謂天條：

//每匹馬的騎師均須於整場賽事中採取一切合理而又可容許的措施，確保給予其坐騎十足爭勝機會，或取得最佳名次。//

2月22日嘅研訊入面，容天鵬同周俊樂先後作供。容天鵬確認佢曾指示周俊樂於賽事早段靠近領放馬，而基於「綫路光明」衝程短，容天鵬叫周俊樂直路初稍留，等「綫路光明」只作短距離衝刺。而呢項指示同佢之前就同一匹賽駒嘅策騎指示一致。

周俊樂喺2月22號同今日都有作供，佢就話出閘後無耐見到「歐洲導彈」喺內側頂住佢，而且賽事當時步速偏快，因此佢決定稍後置於「合金皇」身後。佢喺轉入直路至最後300米左右將坐騎推進至「合金皇」外側，並按照容天鵬指示留住坐騎，於最後300至200米左右略為加速坐騎，踏入最後200米就全力催策坐騎。但於最後150米被撞，以致最後75米先可以取回平衡再衝刺。除左作供外，周俊樂亦提供唔同巡邏影片，相信係案例比小組參考，證明自己已經採取一切合理而又可容許的措施，確保給予其坐騎十足爭勝機會，或取得最佳名次。

另外，小組亦提到佢地參考左該場賽事嘅投注紀錄報告，證實並無任何異常投注行為。小組亦有考慮「綫路光明」以往嘅策騎方式。

小組考慮以上證供後，表示唔會指控周俊樂違反賽事規例第99(2) 條：

雖然周俊樂可以喺早段大力催策，以獲得更貼近前領馬嘅位置，但由於當時步速較標準時間快0.45秒，故唔大力催策上前並非不合理。

於最後直路初至最後300米，周俊樂努力遵守策騎指示留住坐騎。雖然未有催策為失誤，但周俊樂唔應該因此被指責及受罰。

而最後200米至終點，周俊樂的催策方式並無不合理之處。佢因為於最後150米處被撞失平衡，而且坐騎又內閃，令佢唔能夠落鞭催策。

小組最後提醒周俊樂日後喺類似情況下要處理比今次好，以免受到質疑。

以往我地見到押後研訊，都會相信騎師凶多吉少，今次相信大家都會有呢個感覺。新首席受薪董事上場後，尺度同以往有唔同，似乎連程序都同以往有唔同。從馬會發布嘅新聞稿所見，容天鵬同周俊樂嘅供詞，同2月22號基本相同，有趣嘅係今次參考埋投注紀錄報告及周俊樂提供巡邏影片就有唔同結論。如果投注紀錄報告係考慮判決嘅重要因素，相信日後押後研訊嘅機會會大大提高，畢竟檢查異常未必可以賽事當日完成。


Source: HKJC
Photo: HKJC

==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1