Tony

18 May 2021 at 9:33:23 am

睇完維多利亞一哩賽，睇埋今個週末日本幾場賽事。

今個星期都有日本騎師達到里程碑，包括幸英明喺中京贏出第1500場頭馬，李慕華喺星期日贏「放聲歡呼」之前亦達成史上最快1400場頭馬。另外，星期日東京第3場泥地未勝利賽都有一條老將Q，田中勝春柴田善臣呢兩位年過50嘅老將包Q返嚟，仲要鬥足一條直路幾精彩。

星期六中京舉行跳欄重賞京都High Jump，賽前一個星期宣佈引退轉任幕後嘅三津谷隼人以今場作告別戰，今場就騎Mani出賽，沿途跟住第三位，冇乜失誤之下喺最後900米取得領先位置，成功將優勢守到最後。三津谷出道七年，最後一戰先第一次贏出重賞，可以話係幫佢嘅騎師生涯畫上完美嘅休止符，希望佢轉幕後做助手有更好發展。
https://www.youtube.com/watch?v=GKfV-5RNdk8

同日東京就有二級賽京王杯春季盃，呢場繼續做返高松宮紀念遺材賽，「禮讚歌詠」(Lauda Sion)上場高松宮一步都冇，今場返嚟未失過Q嘅東京上陣，用返同樣跑法兼夾前面有隻絲綢會自己友係咁放就Easy得多，入到最後200米成功突圍再力拒「小俏皮」(Travesura)來犯保住勝果，取得安田紀念優先出賽資格。
https://www.youtube.com/watch?v=sipcODGMFls

最後就有精選條件賽，「氣自豪」全妹Ecrin d'Or話跑一場條件賽就個個走夾唔抖，結果連埋佢得8隻跑，而且有4隻係處女馬，即係話李慕華又可當呢組馬係嘍囉啦，起碼慢一慢再沿途走三疊望空，直路一邊騎輕輕打兩鞭教下隻馬輕輕鬆鬆咁過終點，2戰全勝，下場可以留返秋天再用過。
https://www.youtube.com/watch?v=0Gx8qIfvKMA