【一路好走】騎師柳田泰己離世 享年28歲

Homan

9 August 2022 at 9:18:29 am

日藉騎師柳田泰己早前於紐西蘭墮馬嚴重受傷，被送往懷托卡（Waikato）醫院治理（相關報導：https://bit.ly/3BALKHw）。

記者Michael Guerin一直追蹤其情況，今早於其社交媒體表示，柳田泰己於懷托卡醫院在家人陪同下離世，享年28歲。之後該帖文一度被刪除，最後從多方確認後，佢於今日與世長辭。

柳田泰己於高中時希望成為騎師，並於日本嘅育成牧場累積經驗。及後到澳洲習騎並於2017年喺紐西蘭出道。佢曾喺兩個月前嘅訪問向傳媒透露自己嘅媽媽曾不同意佢成為騎師，更認為佢一定要完成大學先可以再於賽馬界發展。佢當時讀左一年大學然後就去澳洲習騎。其母之後為佢做到自己想做嘅野感到開心，不過佢都不時會擔心佢陣上嘅安全。

練馬師蘇利雲對柳田離世嘅消息感到傷感。而佢認為柳田身型嘅關係，要保持到體重並不容易，呢位相當勤力嘅年青人一直保持住適合嘅磅位。蘇利雲明言今日係令人傷感嘅一日。

而佢嘅好朋友熊谷勇斗就表示柳田係佢一位好特別嘅朋友，佢感到相當相當傷心。佢眼中嘅柳田係一位熱愛策騎及努力保持磅位及不斷希望精進騎術嘅騎師。

柳田策騎生涯共獲162場頭馬，今年初於1月首勝級際賽，逐步於當地站穩陣腳。佢喺大家眼中係一位有禮、令人愉快且全情投入嘅年輕人。可惜佢喺上星期三嘅墮馬意外受傷，今日與世長辭。


消息來源：https://www.nzherald.co.nz/sport/horse-racing-japanese-jockey-taiki-yanagida-dies-following-tragic-fall-in-cambridge/XLQYI7WJUJ3DKEKJMKWRSP5AQQ/


Source & Photo: nzherald