【一級賽預賽追蹤】

Tony

1 March 2020 at 12:13:17 pm

日本馬圈牌照結算日戰果速遞！

今年呢個結算日適逢28年一次閏年跑星期六兼閉門作賽，賽事移師阪神、中山同中京舉行。要交牌嘅包括由騎師轉任練馬師嘅四位洋文，星期六最後一日出賽都憑Hammerfest贏出阪神第3場賽事，但係佢之後嘅第5場座騎阻到人要停賽4日。作田誠二同山內研二兩位練馬師年滿70歲退休，其中作田有2場頭馬，包括星期六阪神表列賽仁川錦標憑History Maker取勝；最後一匹參戰馬係星期日中京第8場Viva Bacchus亦都贏馬榮休。山內就贏咗3場，佢喺星期日阪神尾場派3隻馬上陣，憑Jouer Atout贏馬榮休。

四位新騎師星期日出道，唯一一位嚟自關西嘅泉谷楓真喺阪神頭場初次上陣就騎Meisho Hibari贏馬，不過係比國分恭介嘅座騎T M Revue分走半場頭馬。呢位新人可以話備受矚目，師傅係騎師出身嘅本田優，又係跟武豊同李慕華同一個經理人豊沢先生，之後應該會騎到唔少實力馬。另外三位關東所屬嘅騎師都冇馬贏，最佳成績都係止於3至5名。

3歲戰線方面，星期日阪神表列賽堇菜錦標，呢場可以話係嚟緊三冠戰線參考賽事，年年出馬都少，今年都係得5隻馬上陣，L'Excellence留到包尾，入直路彎移定出去望空終點前岩岩好贏守好位嘅Aristoteles，Aristoteles又一次做緊「振奮士氣」個位指定第2。L'Excellence張打吡入場劵都幾穩陣下，之後可以留意佢跑成點，不過主角就唔到佢做啦。

兩場級際賽先講阪急盃，呢場亂到開乜賽果都唔出奇，結果Best Actor直路上衝一段掃晒取得高松宮紀念優先出賽權，不過練馬師鹿戶雄一就話目標係安田紀念，嚟緊高松宮紀念就唔會見到佢啦。賽後就有研訊，跑第2嘅Diatonic直路上阻到「菲亞諾」入內欄塞車，川田將雅過終點即刻向住北村友一話有唔妥，結果「菲亞諾」告甩Diatonic變第2，而北村友一就會停賽6日，但係高松宮紀念就唔受影響。

至於中山紀念，喺快步速之下就益咗沿途守第3位嘅Danon Kingly喺直路上控制大局，取得大阪盃優先出賽權。賽後練馬師萩原清話大阪盃應該係目標，準備定譯名都得啦。跑完香港國際賽果4隻馬，「旺紫丁」終點前過咗「觸動心弦」攞第2；打算嚟香港嘅「冠軍車手」上完條斜就停咗，過唔到「觸動心弦」只得第4，隻馬1800係嫌長，奈何年頭冇賽事岩佢跑，如果再嚟香港唔好好似上次咁塞紅隧就得啦。賽後去杜拜嘅「波斯劍客」第5，今場志在熱身但係去杜拜對大局威脅唔大；沙田馬王「勝出光采」換文力威跑到報失，三連霸咁就冇咗。贏香港盃果場松岡用足10成功力先贏，唔知係換咗人定隻馬未回復啦，嚟緊過香港跑女皇盃換莫雷拉可唔可以再掃晒呢？

重播：
https://www.youtube.com/watch?v=oy95TUN13F0
https://www.youtube.com/watch?v=P96PSp9FQgU
https://www.youtube.com/watch?v=y2SxNK3IOYo
https://www.youtube.com/watch?v=IBaMXNWD-Ek