【一代傳奇】回流維省一個月後 澳洲騎師薄奇能宣布退休

Homan

25 November 2021, 8:58:10 am

澳洲騎師薄奇能上個月宣布會趁維省春季嘉年華賽期後,轉移策騎基地(相關報導:https://bit.ly/3FLdjwr)。佢於嘉年華賽期後就再無上陣,而今日薄奇能對外公布。佢將於今個星期六嘅Zipping Classic賽日後退役。

呢位52歲殿堂級騎師已經策騎多年,最為人所熟悉一定佢早年於維省策騎時,夥拍「戴花」(Makybe Diva)三奪墨爾本盃。除此之外,佢亦曾策騎「戴花」、「海洋公園」(Ocean Park)、「信可成真」(So You Think)及「龍子爵」(Sir Dragonet)分別贏得四次覺士盾。過往佢亦於香港、澳門及新加坡等地客串,終於2019年回到澳洲發展。當時雖然已經去到策騎生涯嘅晚年,但佢仍然不時有佳作,甚至成為唔少練馬師嘅輕磅馬殺手,佢回澳後曾策「科靈港」(Kolding)贏得葉森讓賽、Yes Yes Yes贏得The Everest及「露營友」(Bivouac)贏得新市場讓賽等大賽。

佢於訪問中透露,佢近排一直有退休嘅諗法,佢發現自己近來對策騎未有全情投入,並認為而家正是宣布退休嘅適當時間。佢形容自己唔係猶疑不決嘅人,當有退休嘅諗法,佢認為要立刻做。而佢已經準備好展開人生新一章。

除左預備好繼續陪一對子女,更已接受當地博彩公司Entain嘅邀請,加入佢地為該博彩公司嘅顧客帶來更多賽馬方面嘅獨特見解。該公司嘅GM Andy Hoad就話非常欣賞薄奇能不諱言,而且對賽馬亦相當有熱情。相信稍後會到薄奇能以另一個身份為當地馬圈服務。

薄奇能就話自己任務並未結束,佢將會策騎剛易主嘅「傳教團」(Spanish Mission)於今個星期六上陣,該駒將會於主題賽事Zipping Classic上陣,睇下薄奇能可唔可以頭馬完成騎師生涯最後任務喇!

薄奇能現年52歲,策騎生涯贏得至少2400場頭馬,一級賽冠軍多達90場,澳洲只有五位策騎比佢贏得更多一級賽冠軍。


Source: Racenet, RSN
Photo: Racenet