Homan

17 July 2020 at 2:53:03 am

今個香港馬季正式落幕，各項獎項於琴晚冠軍人馬獎頒獎禮頒發。

香港馬王最終由「時時精綵」獲得，季內贏得女皇盃及遮打盃兩項一級賽，成功登上馬王寶座。而佢同時都獲得最佳中距哩馬及最佳長途馬。

而最佳短途馬就由「爭分奪秒」贏得，今年短途戰線並冇一駒特別突出，最終由下半季休戰，兩勝一級賽既「爭分奪秒」攞到。

最佳一哩馬稍為有啲意外為「美麗傳承」，季內攻下女皇銀禧紀念盃。雖季內並無奪得一哩一級賽，但先後於三項一哩一級賽上名，包括董事盃及冠軍一哩賽奪亞及香港一哩錦標奪得季軍。

而失落馬王既「金鎗六十」就贏得最佳四歲馬及最受歡迎馬匹。季內七戰全勝並攻下四歲三冠，但似乎仍不足以贏得馬王。贏唔到馬王卻是公眾最受歡迎馬匹，或許來季攻下一級賽會可以令佢登上馬王寶座。

而最佳新馬則由「寶成智勝」奪得，三月初出至季尾四個月內贏得四場頭馬。

「四班又贏、三班又贏、連二班佢又贏埋」既「君達星」就以季內42分加幅贏得最大進步馬匹。

騎師獎方面，潘頓第四度登上冠軍騎師寶座。季初雖一度落後，但隨著莫雷拉季尾成績下滑及多停賽，潘頓最終再次贏得冠軍騎師稱號。香港騎師何澤堯季內贏得四歲三冠及個人首項一級賽，更以67場頭馬排係騎師榜第四名，令佢贏得告東尼獎及最受歡迎騎師。

而練馬師方面，姚本輝自2013年後，再有華人登上冠軍練馬師寶座。今季無論舊馬同新馬都交出一個相當好既成績，可以話係實至名歸。而今季為最後一季於香港從練既大摩，就獲頒終身成就獎，以表揚佢對香港賽馬既貢獻，無論係騎師時代定練馬師時代。佢稍後將會番回澳洲繼續練馬。