【「日出之國」「業界巨頭」全妹成達德素十月拍賣會標王】

Homan

9 October 2020, 12:10:23 pm

達德素十月拍賣會Book 1向來都極受注目,畢竟唔少拍賣既週歲馬於日後服役都能取得級際賽甚至一級賽冠軍。因此唔少大馬主都願意一擲千金。今年雖然受疫情影響,但兩大集團古摩亞及高多芬依然購入唔少週歲馬。

古摩亞一共購入14匹週歲馬,當中Lot 436既「日出之國」及「業界巨頭」既全妹以三百四十萬堅尼成交(約三千四百萬港元),成為Book 1拍賣會既標王。成個拍賣會,古摩亞洗左九百七十八萬堅尼(約九千七百萬港元)購入週歲馬,當中有新種如「邱吉爾」(Churchill)及「巴洛妙筆」(Caravaggio)等。

而高多芬雖然冇馬以三百萬堅尼以上成交,不過佢一共洗左一千六百四十幾萬堅尼(約一億六千萬港元)購入22匹週歲馬。當中以二百一十萬堅尼(約二千一百萬港元)購入出自「杜拜威」(Dubawi),2019朱德望國際錦標季軍「一板一眼」(Elarqam)既外甥。另外以二百萬堅尼(約二千萬港元)購入出自「范高爾」(Frankel)既「金號角」半弟。

而香港賽馬會亦係Book 1購入週歲馬,佢地以二十萬堅尼(約二百萬港元)購入一匹「燈塔島」(Fastnet Rock),相信會係2022年既國際馬匹拍賣會轉售。

Source: Racing Post